第一課 新年傳說
課文
過新年，佇大部分人心中是一个非常歡喜的節日，除了會使放長假以外，嘛會當食腥臊的年菜，囡仔人閣有紅包通提，毋過恁敢知影，這寡過年的習俗活動，攏有𪜶特別的因由喔！
講著過年的由來，誠濟人攏會馬上回答「年獸」，猶毋過，真正的主角其實毋是年獸，是「燈猴」。我進前捌聽人講過，台灣過年的民間故事是源自「沉島傳說」，因為百姓佇年尾咧拜神明的時，攏無共神明桌仔頂懸咧管蠟燭、燈火的燈猴當做一回事，這引起燈猴的不滿，所以伊走去共玉皇大帝投，投講百姓欲食毋討趁、毋知影感恩，玉皇大帝聽煞了後，就決定欲佇一年的最後一工用大雨予台灣做大水，共台灣淹過，來處罰百姓。眾神知影這件代誌了後，除了鬥求情，嘛託夢予百姓，愛逐家做好準備。逐家知影台灣島欲予淹去的時，就開始共厝內的神明送轉去天庭，這款動作就演變做這馬的「送神日」。佇沉島的前一工，家家戶戶攏和家己厝內底的人團圓做伙，做最後一改的拜拜、食最後一頓飯，這就成做這馬的拜公媽和圍爐。吃飯飽，共厝內的錢分予厝內人，就是這馬的分紅包。最後，好佳哉因為有眾神鬥相共求情，予玉皇大帝願意放過百姓。過轉工是初一，逐家發現無落雨，台灣嘛無去予淹過，就開始放炮、講恭喜，慶祝逐家平安活落來。
這个民間故事清楚交代過年逐項活動的由來，所以以後若是有人咧問恁講有關過年的故事，毋通閣講是年獸喔！
語詞解說
◆腥臊 tshenn-tshau / tshe-tshau -〔形容詞〕指菜色豐盛。
例句：敢是有人客欲來？下暗哪會煮甲遮爾仔腥臊？
(難道是有客人要來？晚上怎麼煮得這麼豐盛？)
◆討趁 thó-thàn -〔動詞〕工作賺錢來過生活。
例句：人若是欲食毋討趁，註定是一世人抾捔啦。
(人如果是光享受而不工作，註定是一輩子沒出息啦。)
◆做大水 tsò-tuā-tsuí / tsuè-tuā-tsuí -〔動詞〕水災、淹水。
例句：這擺市內做大水，損失誠嚴重。
(這次都市裡發生水災，損失慘重。)
◆好佳哉 hó-ka-tsài -〔形容詞〕幸虧、還好。
例句：好佳哉有你佇咧，無我就慘矣。
(幸虧有你在，否則我就慘了。)
◆鬥相共 tàu-sann-kāng -〔動詞〕幫忙。幫助他人做事或解決困難。
例句：你敢有需要人共你鬥相共？
(你是否需要別人幫忙？)
句型
◆除了……閣…… → 除了……還……
例句：今仔日的功課除了數學以外，閣有國語作業簿愛寫。
(今天的功課除了數學以外，還有國語作業簿要寫。)
閱讀測驗 O抑是X
←答案和解說
( )1.台灣過年的民間故事是源自「沉島傳說」。
( )2.燈猴佇神明桌頂懸是咧管花草的。
( )3.過年時分的紅包嘛會使講是硩年錢。
( )4.百姓知影台灣欲予淹去的時，開始共厝內的神明送轉去天庭，這是「送神日」
的由來。
( )5.台灣人最後有予淹死。