第十課 Amis的傳說故事
課文
想欲了解一个文化，毋是對實體的文物展覽就會使完全熟似的，透過傳唱的歌曲、風俗習慣、神話佮傳說故事的體驗、內涵的理解等等，才有法度更加全面來看一个文化，其中「神話」和「傳說故事」攏是一種口傳文學，紲落來，咱就來看一篇有關阿美族「狗」的由來的傳說故事。
聽講佇古早，火燒島(就是這馬的綠島)和馬蘭社(台東的馬蘭部落)之間有一个橋相通，有一工，一个叫做洛亞卑的人對火燒島𤆬三隻狗仔轉來馬蘭社，逐家攏無看過狗仔，所以真欣羨伊的狗會當替伊拍獵，毋過因為彼三隻狗會咬人，所以洛亞卑就做牆圍仔共狗仔關起來。
有一工，卑南社的人想著一个方法欲去掠洛亞卑的狗仔轉來飼，𪜶做五十粒「黏糕」去拜訪洛亞卑，洛亞卑原底無想欲開門，驚伊的狗仔會去咬遐的卑南社人，毋過因為𪜶堅持愛洛亞卑開門，後來洛亞卑才共門仔拍開，當然，彼三隻狗仔就衝出來欲咬人，這个時陣，卑南社人緊共𪜶攢好勢的黏糕擲出去，彼三隻狗仔馬上轉換目標，向黏糕衝過，黏糕真黏，共狗仔的喙齒黏牢牢，一个叫做戴爾比的人趁這个機會掠著一隻狗仔，𤆬轉去卑南社飼，自彼陣才開始有愈來愈濟隻狗仔。
除了和動物的由來相關的故事以外，阿美族猶有真濟種無仝類的傳說故事和神話故事，譬論講有關宗教、自然現象、感情等等，真濟多元的故事，假使逐家有興趣，就毋通閣等矣，緊去揣故事來讀！
語詞解說
◆熟似si̍k-sāi -〔動詞〕熟識。素來認識。
例句：𪜶兩个熟似真久矣。
(他們倆個認識很久了。)
◆欣羨him-siān -〔動詞〕羨慕、歆羨。
例句：伊定定出國，予人真欣羨。
(他常常出國，讓人很羨慕。)
◆牆圍仔tshiûnn-uî-á -〔名詞〕圍牆。
例句：阮學校的牆圍仔是白色的。
(我們學校的圍牆是白色的。)
◆假使ká-sú -〔連詞〕假如、如果。
例句：假使若落雨，我就無愛去。
(如果下雨，我就不去了。)
句型
◆假使……就…… → 如果……就……
例句：假使你功課攏寫了矣，就會使去公園耍。
(如果你功課都寫完了，就可以去公園玩。)
閱讀測驗 O抑是X
( ) 1.只要對實體的文物展覽就會使完全熟似一个文化。
( ) 2.「神話」和「傳說故事」攏是口傳文學的一種。
( ) 3.因為洛亞卑飼的彼三隻狗會咬人，所以就做牆圍仔共狗仔關起來。
( ) 4.卑南社的人為著欲掠狗仔，做五十粒黏糕拍算共狗仔的喙黏起來。
( ) 5.阿美族的傳說故事全部攏和動物相關。
←答案和解說
參考文獻、書目
‧簡美玲，〈阿美族起源神話與發祥傳說初探-兼論阿美族亞群的類緣關係〉，《中央研究院台灣史研究》第一卷第二期，1994。
‧達西屋拉彎‧畢馬(2003)。《阿美族神話與傳說》。臺中：晨星出版。