第二課 三月迎媽祖
課文
媽祖，閣叫做天上聖母、海上女神，是民間信仰當中的海神、漁民的保護神，嘛是沿海地區的守護神，伊的故事愛對宋朝開始講起，傳說中，伊的原名叫做林默娘，佇中國福建出世，因為伊慈悲、救苦救難的代誌真濟，所以予人尊稱做「媽祖」，根據傳說，伊會當預測海上的風雨，化解海上發生的災難，一直到這馬，佇台灣，媽祖已經對單純的海洋神，變做是一位逐家毋管啥物代誌，攏會去共伊祈求、稟報的「媽媽」。
每一冬的咱人三月二三，是媽祖生的日子，各地的媽祖廟攏會舉辦相關的儀式活動來慶祝，台中的大甲媽和苗栗的白沙屯媽尤其是台灣上重要的媽祖信仰中心之一，其中，大甲媽祖遶境進香會當講是全台灣上盛大的媽祖遶境活動，嘛是世界前三宗教活動之一，每一年攏吸引幾十萬的信眾同齊參與，除了大甲媽的遶境和白沙屯媽的進香活動，其他各地媽祖的相關活動雖然無親像𪜶的規模遮大，毋過仝款充滿信眾的熱情佮誠心。
迎媽祖的活動毋但是一場宗教儀式，閣是民間文化的大代誌，展現逐家對媽祖的虔誠和感恩之情，遮的活動嘛刺激各地的文化交流和觀光產業，愈來愈濟的外國遊客嘛來參與、感受這款風俗民情，歡迎逐家做伙來體驗其中感動的故事、人情的溫暖。
語詞解說
◆出世tshut-sì -〔動詞〕出生、誕生。
例句：我佇臺灣出世的。
(我在臺灣出生的。)
◆咱人lán-lâng -〔名詞〕指農曆，是臺灣人原本使用的傳統曆法，相對於日治時代日本人
引進的新式曆法。
例句：阿媽生日是咱人當時？
(奶奶生日是農曆幾月幾號？)
◆同齊tâng-tsê -〔副詞〕同時一起。
例句：我佮阿姊同齊去踅街。
(我和姊姊一起去逛街。)
句型
◆毋但……閣…… → 不只……還……
例句：伊毋但逐擺攏考第一名，閣足𠢕拍球。
(他不只每次都考第一名，還很擅長打球。)
閱讀測驗 O抑是X
( ) 1.媽祖嘛叫做天上聖母，是民間信仰當中的海神、漁民的保護神，嘛是沿海地區的
守護神。
( ) 2.媽祖只有管海上的代誌，其他代誌愛去揣其他神明。
( ) 3.每一年咱人三月二三是媽祖生的日子，台中的大甲是唯一會舉辦慶祝儀式的所
在。
( ) 4.大甲媽祖遶境進香是全台灣上盛大的媽祖遶境活動，嘛是世界前三大的宗教活動
之一，每一年攏會吸引幾十萬的信眾來參與。
( ) 5.這馬的媽祖遶境進香，除了台灣人以外，連國外來的遊客嘛會做伙來參與。