第三課 清明節(寒食佮上巳)

    有真濟人會認為講清明就是一个節日，毋過，伊其實是二十四節氣之一喔！這馬清明節的習俗活動，像拜公媽、掃墓攏是源自寒食節；清明的時陣嘛會有人去踏草青，這是上巳節的習俗，用數學算式來表現：清明節(寒食佮上巳)。猶閣有，因為寒食節、上巳節和清明的日子真倚近，所以這幾个節日的習俗就合做伙矣，清明嘛對單純的農業節氣，成做重要的節日。

    講著寒食節，為啥物愛食寒食，袂使開火呢？相傳佇中國春秋時代的時，重耳當咧落魄的時，伊身軀邊有一个人名號做介之推的人，一直佇伊身軀邊綴伊食苦，介之推甚至佇重耳上落魄的時，共家己的肉割落來予介之推止枵。後來重耳的天年來矣，伊成做君王，號做晉文公，伊想欲揣介之推來做官，毋過彼時的介之推已經去山頂隱居，按怎揣攏揣無……晉文公想著用放火燒山的方式共介之推逼出來，結果伊煞無出現，顛倒去予燒死，自彼時以後，除了拜公媽 、掃墓，百姓嘛會佇這工用毋開火的方式來紀念介之推。像這馬逐家佇清明攏會食的粿和潤餅，𪜶攏是毋免開火就會使完成的料理，算寒食的一種。
   

    清明節對大部分人來講，是對公媽、故人表達尊敬、思念和感謝的日子，雖然𪜶已經死亡，毋過我相信，𪜶只是換一種方式踮佇阮身邊。有人講，清明節嘛可比西方的感恩節，毋但予閣佇阮身軀邊的厝內人團圓做伙，嘛連結著已經往生去的親人，這就是一家伙仔。