第四課 中元節的故事

    舊曆七月十五是中元節，閣號做鬼節、孝子節、盂蘭盆節。這工毋但是傳統民俗的節日，嘛是道教、佛教的重要節日之一。佇這工，百姓除了拜公媽，閣會拜地官大帝和孤魂野鬼，欸，為啥物愛拜這濟項呢？

    紲落來我欲講兩个和中元節有關的故事:
    地官大帝的名號做「舜」，伊的親生媽媽真早就往生矣，阿爸和閣娶的後某有生一个後生。舜非常有孝，嘛真照顧仝爸各母的弟弟，毋過善良的伊煞定定去予人做肉砧…雖然伊予厝內人欺負，但是伊竟然猶原保持好心肝，這件代誌予天地真感動，就共伊封做地官大帝，負責管地府的代誌。伊的生日就是舊曆七月十五這工，所以這工嘛予人講做是孝子節。
 

    佇佛教的部分，傳說中有一位弟子叫做目連，伊自細漢就真善良，毋過伊的阿母煞是一个歹心烏漉肚的查某人，做真濟歹代誌。伊的阿母過身了後變做袂當食飯的鬼，目連看著家己媽媽曲去了後經歷的苦難，感覺真悲傷，就揣佛祖鬥相共救伊的阿母。佛祖講愛佇舊曆七月十五這工準備食物予和尚，嘛愛共功德轉予伊的阿母和其他亡者，按呢就會使解除𪜶的業報和痛苦。這就是盂蘭盆會的由來，後來這个儀式和道教的中元普度結合，成做這馬的中元節。
   

    講著中元普渡，算是中元節上重要的活動，百姓會佇厝內抑是廟裡攢寡祭品來拜神明、公媽和好兄弟，表示尊敬。較特別的是拜好兄弟的時間和拜公媽的時間無啥仝，愛佇下晡1點到5點之間，上好佇日頭落山進前就愛拜煞…猶有，拜好兄弟的時閣會準備面桶和面巾，予好兄弟仔會使共身軀擦予清氣。而且佇這个月份逐家攏袂辦喜事，因為驚會引起好兄弟的注意，無細膩就共𤆬轉去厝，愛注意的點真濟，逐家愛會記得喔！