第五課 東港燒王船
課文
恁有聽過王爺信仰無？王爺信仰是臺灣誠重要的民間信仰，尤其是佇西南沿海地區。王爺是和對抗疾病、瘟疫有關的，毋過到今，已經轉變做平安祭典，嘛展現沿海生活文化的模樣，王爺這馬嘛成做守護神的存在和信仰寄託。
王爺信仰上有代表性的儀式就是三年一擺的屏東東港燒王船祭典，燒王船的流程非常複雜，對頭到尾大概有十幾項，包括設代天府、造王船等等的準備工課，較特別的是，每一擺舉辦的日子是東隆宮廟方用跋桮決定的。準備工課做煞了後，紲落來是請王、過火、出巡繞境、遷船和送王等等的儀式。佇這當中，「請王」才算是規个祭典活動的正式開始，佇海邊集合迎王了後，會送王船出巡，沿途消滅歹物仔，嘛有撫慰人心的作用。有請神，就有送神，「送王」是祭典的最後一步，嘛是最盛大、精彩的儀式，大概佇祭典上尾一工的半暝來進行。一隻豪華美麗的王船，佇猛火中化成灰，燒了愈完全，嘛代表是王爺順利轉到天頂，這送神歸天的畫面真正是非常壯觀。
若是有閒、有時間，真推薦逐家會使參加燒王船的儀式，親目睭所看著的一定會比我佇遮寫的閣較精采。
語詞解說
◆工課 khang-khuè -〔名詞〕工作、事情。
例句：我的工課足濟的。
(我的工作很多。)
◆歹物仔 pháinn-mih-á -〔名詞〕指鬼怪或不祥的人物、東西。
例句：三更半暝走去墓仔埔，你敢毋驚去看著歹物仔？
(三更半夜跑到墓園墳場去，你難道不怕看到鬼嗎？)
-〔名詞〕惡性腫瘤。
例句：醫生檢查出伊腹肚內有生歹物仔。
(醫生檢查出他肚子裡長了惡性腫瘤。)
◆猛火 mé-hué / mé-hé-〔名詞〕極為強烈的大火。
例句：炒青菜愛用猛火。
(炒青菜要用強一點的火。)
句型
◆有……無？ → 有……嗎？
例句：你有閒無？
(你有空嗎？)
閱讀測驗 O抑是X
←答案和解說
( )1. 王爺佇西南沿海地區是非常重要嘛真有代表性。
( )2. 東港燒王船祭典是逐年攏有的。
( )3. 每一擺燒王船舉辦的日子是固定的。
( )4. 東港燒王船的東港是佇咧屏東。
( )5.送王的時間大概佇祭典上尾一工的半暝。