第六課 中秋節
課文
若講著中秋節的神話故事，你第一个會想著啥？是古錐的月兔、飛上天的嫦娥、猶是刜樹仔的吳剛？
中秋節的時間，佇每一冬的舊曆8月15，因為佇三秋的中央，所以號做中秋。咱攏知15這工是滿月，而且佇舊曆8月15這工，是月娘上大、上圓的時陣，所以看月娘是逐家佇中秋節攏會做的代誌。15的月娘圓輾輾，「圓」表示團圓，嘛代表這是予厝內人抑是四方朋友會使做陣過節的好機會，逐家做伙感受中秋節的快樂。
除了看月娘，嘛真濟人會佇中秋的時烘肉、食月餅和柚仔，講著柚仔，毋但有著時，伊閣佇華語的音佮『遊子』真相𫝛，希望佇外口拍拚的人會使佇這工轉來厝團圓，嘛有人認為講，柚仔的柚和庇佑的佑是仝款的音，代表保庇的意思。
逐家定咧佇中秋節的時陣烘肉，其實烘肉這个活動，毋是對進前到今一直攏有的習俗活動。伊的起源是佇1986年的時陣，豆油品牌《萬家香》以烘肉佮醬料做結合，拍出大部分人攏聽過的『一家烤肉萬家香』廣告，這段廣告詞造成一陣流行，嘛予烘肉這件代誌成做逐家佇中秋節一定會進行的活動。
中秋節會使進行的活動十花五色，其實𪜶當中的共同點就是予逐家集倚做伙，月圓人團圓，毋管按怎過中秋節，囥佇逐家心中上重要的意涵就是團圓。
語詞解說
◆刜 phut -〔動詞〕用刀子砍。
例句：刜樹仔。
(砍樹。)
-〔動詞〕不計後果地胡亂做事或隨意揮霍。
例句：𪜶老爸放予伊的財產，伊無幾年就刜了了矣。
(他老爸留給他的財產，他沒幾年就揮霍光了。)
◆圓輾輾 înn-liàn-liàn -〔形容詞〕圓滾滾。形容體態或物體形狀非常圓。
例句：你按呢食甲肥朒朒，身軀圓輾輾，愛較捷運動咧喔！
(你這樣子吃得肥滋滋的，身材圓滾滾，要勤於運動喔！)
◆做陣 tsò-tīn / tsuè-tīn -〔副詞〕一起、結伴。
例句：咱做陣來去南方澳仔食海產。
(我們一起到南方澳吃海鮮。)
◆著時 tio̍h-sî -〔形容詞〕符合時宜。
例句：伊的穿插真著時。
(他的穿著打扮很符合時宜。)
-〔形容詞〕當季、符合節令。
例句：西瓜著愛著時才會好食。
(西瓜要當季出產的才好吃。)
◆十花五色 tsa̍p-hue-gōo-sik -〔形容詞〕五花八門、形形色色。
例句：十花五色的人
(形形色色的人)
句型
◆佇……的時陣…… → 在……的時候……
例句：佇睏袂去的時陣，我攏會泡一杯牛奶來啉。
(在睡不著的時候，我都會泡一杯牛奶喝。)
閱讀測驗 O抑是X
( )1.佇神話故事當中，吳剛是予玉皇大帝處罰去種樹仔。
( )2.中秋節的時間是每一年的新曆8月15。
( )3.柚仔的柚和庇佑的佑是仝款的音，代表保庇的意思。
( )4.烘肉的起源和《萬家香》『一家烤肉萬家香』廣告有關。
( )5.除了食柚仔和夯肉，食月餅嘛是中秋節會進行的活動之一。