第七課 宜蘭Atayal的克里奧語
課文
佇台灣，你一定捌聽過台語、客語、華語等等無仝款的語言，毋過你敢知影有一種語言叫做「克里奧語」？所謂的「克里奧語」，是咧講當當兩个語言相拄著的時陣，融合這兩種語言，產生一个新的語言系統的現象，這款現象上捷出現佇予人殖民過的國家、地區，今仔日，咱就做伙來看宜蘭縣泰雅族的克里奧語。
泰雅族的克里奧語主要分布佇宜蘭縣大同鄉寒溪村、南澳鄉的東岳村、金洋村閣有澳花村四个庄頭，會出現這款語言的原因咧，就愛講到台灣曾經予日本統治的日本時代，彼陣，日語是標準話，也就是國語，是講一般的台灣人雖然會曉講日語，不而過日語只是一種共通語爾爾，也就是講，只有和日本人溝通的時陣才會使用較標準的日語來講話，平常時仔講的話，猶原是有誠厚的本土特色，毋過話閣講轉來拄才講著的遐的庄頭，𪜶顛倒是以日語為主，將日語和泰雅語的詞彙、語法融合，嘛透濫一寡華語詞和閩南語詞，形成一種新的母語，一直到今，咧使用這款語言的人差不多閣有3000人左右。
2001年舉辦原住民母語能力檢定的時陣，宜蘭的克里奧語去予人排除在外，經過居民的積極爭取，後來總算以「寒溪泰雅語」的名義承認是泰雅語的一个方言，納入母語能力檢定範圍，咱對任何族群的語言、文化等等，攏應該愛保有尊重、重視的心。
語詞解說
◆當當 tng-tong/tng-tang -〔副詞〕正在、正值。表示進行貌與持續貌。
例句：當當伊咧受氣的時陣，上好莫去揣伊，較袂去掃著風颱尾。
(當他正在生氣的時候最好不要去找他，才不會遭魚池之殃。)
◆透濫 thàu-lām -〔動詞〕參雜混合。
例句：這味產品是純天然成分煉成的，無透濫一寡有的無的。
(這道產品是純天然成分煉製成的，沒有參雜一些不明添加物。)
◆到今 kàu-tann -〔副詞〕及今、如今、至今、到如今。
例句：到今你才知！
(你現在才知道啊！)
句型
◆……，不而過…… → ……，不過……
例句：雖然今仔日是風颱天，不而過你嘛是愛去做工課。
(雖然今天是颱風天，不過你還是得去工作。)
閱讀測驗 O抑是X
( ) 1.「克里奧語」是當當兩个語言相拄著的時陣，強勢的語言共弱勢的語言消滅的現 象。
( ) 2.泰雅族的克里奧語只有蹛佇宜蘭縣大同鄉寒溪村的居民才會使用。
( ) 3.佇日本時代，台灣人雖然會曉講日語，不而過日語只是一種共通語，只有和日本 人溝通的時陣才會使用較標準的日語來講話。
( ) 4.西元2001年舉辦原住民母語能力檢定的時陣，宜蘭的克里奧語去予人排除在外，
後來經過居民的積極爭取才總算以「寒溪泰雅語」的名義承認是泰雅語的一个方
言納入母語能力檢定範圍。
( ) 5.咱對任何族群的語言、文化等等，攏應該愛保有尊重、重視的心。