第八課 賽夏族祭典paSta’ay
課文
賽夏族有幾若種無仝的祭典、儀式，其中規模上大、禁忌上濟、過程上複雜的就是「巴斯達隘(paSta’ay)」，嘛叫做矮人祭、矮靈祭，根據賽夏族語的意思，「達隘」就是傳說中的矮人，「巴斯」是祭典的意思，所以講「巴斯達隘」，就是祭拜矮人的祭典。
若欲講著「巴斯達隘」的由來，就愛講著足久足久進前，有一陣生做比賽夏族人較細漢，跤手煞比𪜶閣較扭掠的人—也就是「達隘」，搬去到賽夏族人蹛的所在附近，達隘毋但教賽夏族人欲按怎種作、閣利用法術予天氣變好，攏袂做風颱、落大雨，連鳥鼠、鳥仔嘛袂閣偷吃粟仔，逐年的收成攏比較早閣較好，賽夏族人攏誠心想欲報答達隘對𪜶的恩情，達隘煞漸漸展現出豬哥性，欺負賽夏族的查某人，最後總算袂忍得的賽夏族人想出一个計智，製作陷坑予達隘跋落山溝摔死，好運活落來的達隘共賽夏族人講，𪜶以後定著愛定期舉辦儀式來祭拜矮人，才會當避免災厄。
「巴斯達隘」祭典會當講是賽夏族和達隘之間，化解恩怨的一種儀式，所以伊的性質，和大部分原住民祭典慶祝、歡喜的氣氛無仝，目前這个祭典每兩冬舉辦一改，每十年會有閣較大規模的儀式，時間差不多攏佇舊曆十月中旬左右，分別佇苗栗南庄的向天湖、新竹五峰的大隘祭場舉辦，歡迎逐家佇祭典對外開放的時間前往參與，毋過一定愛遵守規矩、莫去犯著禁忌，尊重每一个族群的文化。
語詞解說
◆扭掠liú-lia̍h -〔形容詞〕形容手腳快、動作敏捷。
例句：伊做代誌跤手真扭掠。
(他做事手腳很敏捷。)
-〔形容詞〕指器物短小而易操作。
例句：這支鋤頭真扭掠。
(這支鋤頭很好用。)
◆粟仔tshik-á -〔名詞〕稻穀。
例句：掖粟仔。
(撒稻穀。)
◆計智kè-tì -〔名詞〕計謀、計策。
例句：你共我鬥想一个計智來對付伊。
(你幫我想一個計謀來對付他。)
◆陷坑hām-khenn/hām-khinn -〔名詞〕陷阱。為捕捉野獸而挖掘的深坑。引申為害人的計
謀。
例句：細膩！頭前有陷坑，毋通跋落去。
(小心！前面有陷阱，不要跌到陷阱裡去。)
◆舊曆kè-tì -〔名詞〕 農曆。漢族傳統通行的曆法，屬「陰陽合曆」的一種。大月三十
天，小月二十九天；平年一年十二個月，閏年十三個月。
例句：舊曆過年公司歇差不多一禮拜。
(農曆過年公司差不多休一個禮拜。)
句型
◆若欲……，就愛…… → 如果要……，就要……
例句：若欲考試考滿分，就愛認真上課、認真複習。
(如果要考試考滿分，就要認真上課、認真複習。)
閱讀測驗 O抑是X
( ) 1.根據賽夏族語的意思，「巴斯」是傳說中的矮人，「達隘」是祭典的意思，所以
「巴斯達隘」，就是祭拜矮人的祭典。
( ) 2.「達隘」雖然生做比賽夏族人較細漢，跤手煞比𪜶閣較扭掠。
( ) 3.達隘除了教賽夏族人欲按怎種作，嘛利用法術予天氣變好，所以逐年的收成攏比
較早閣較好。
( ) 4.「巴斯達隘」是為著慶祝賽夏族人成功共達隘報仇。
( ) 5.目前「巴斯達隘」每兩冬舉辦一改，每十年會有閣較大規模的儀式，時間佇新曆
十月中旬左右。