第九課 永遠的小林部落
課文
高雄市甲仙區的小林部落，伊早期是鄒族的生活範圍，後來蹛的大部分攏是日本時代對台南南化、玉井搬徙過去的大武壠族原住民，嘛有一寡漢人、布農族原住民，遐的居民以做田為主，個性善良，氣候閣四序，曾經是一个風景美麗、人情味厚的庄頭。
西元2009年8月初7，莫拉克風颱正式對花蓮上陸，全台灣風雨交加，各地攏有大大細細的災情傳出來，其中上嚴重、予人上無法度相信的消息，就是佇隔工，8月初8透早，小林部落因為水崩山致使規个庄頭予淹去的新聞，對小林人來講，除了家園無去矣以外，上心疼的是一目𥍉仔失去幾若个家己的親人、朋友，彼款痛苦佮絕望是無法度想像的，根據統計，小林部落至少有四、五百个人因為這改的八八風災失去性命，毋過，災難顛倒展現小林人的儼硬，𪜶團結起來，共同面對挑戰，開始重建家園的工課，政府和各地的志願者嘛攏來鬥相共，新的厝、交通系統、水電設備接紲完工，嘛漸漸發展出新的產業，譬論講旅遊業、手工藝等等。
這馬的小林部落已經漸漸恢復往過的活力，抑毋過八八風災猶原是𪜶心目中無法度放袂記的傷痕，所以加強災害預防意識和應對的能力，變做是小林部落未來發展的其中一項上重要的任務，小林人嘛更加珍惜眼前的幸福生活，骨力拍拚，為著小林部落的未來繼續向前行。
語詞解說
◆四序sù-sī -〔形容詞〕井井有條、妥當。讓人覺得舒服安適的感覺。
例句：代誌做了真四序。
(事情辦得很妥善。)
◆上陸tsiūnn-lio̍k -〔動詞〕登陸。源自日語。
例句：風颱咧欲上陸矣，沿海的庄民攏掣咧等。
(颱風快登陸了，沿海的村民都很緊張。)
◆水崩山tsuí-pang-suann -〔動詞〕洪水造成的山坡崩塌。
例句：欲好，龜𬦰壁；欲敗，水崩山。
(要使家道興旺，就像烏龜爬牆壁那樣困難；一旦家道敗壞，就如土石流那樣快速。)
◆一目𥍉仔tsi̍t-ba̍k-nih-á -〔時間詞〕一瞬間、一眨眼。指很短暫的時間。
例句：對阮厝到公司，行路一目𥍉仔就到矣。
(從我家裡到公司，走路只要一眨眼的時間就可以到了。)
◆儼硬giám-ngē/giám-ngī -〔形容詞〕堅強。
例句：弓蕉去予風颱掃倒了了，咱著較儼硬咧，重來。
(香蕉全被颱風吹倒了，我們要堅強一點，重新來過。)
-〔形容詞〕硬朗。
例句：我老罔老，跤手猶真儼硬。
(我雖然年紀大了些，手腳還很硬朗。)
◆往過 íng-kuè/íng-kè -〔時間詞〕以往、以前。
例句：往過伊攏會來揣阮老爸開講。
(以前他都會來找我爸爸談天。)
句型
◆因為……致使…… → 因為……導致……
例句：因為地動的關係，致使埋佇壁裡的水管破去。
(因為地震的關係，導致埋在牆壁裡面的水管破掉。)
閱讀測驗 O抑是X
( ) 1.高雄市甲仙區的小林部落這馬是鄒族的生活範圍。
( ) 2.莫拉克風颱唯一造成的災害發生佇小林部落。
( ) 3.八八風災雖然造成財物上真大的損失，毋過佳哉無人著傷。
( ) 4.八八風災過去了後，小林部落除了骨力重建家園，嘛發展出較早無的產業。
( ) 5.加強災害預防意識、應對能力，是小林部落未來發展上重要的任務之一。